LAOAG CITY – Agtultuloy nga ipatungpal ti Philippine National Police (PNP) ti ‘no permit, no rally’ policy para kadagiti maiwayat pay a tignay protesta kadagiti sumarsaruno nga aldaw basar ken ni Acting Philippine National Police Chief PLtGen. Jose Melencio Nartatez Jr.
Inpetteng ni Acting Philippine National Police Chief a dagiti organizers dagiti maiwayat a tignay protesta kadagiti nagduduma a paset ti Metro Manila ket nasken laeng a maka-secure kadagiti permit-da tapno mapalubosan a mangiwayat kadagiti programa.
Nagpalagip ni Nartatez kadagiti raliyista a ti EDSA People Power Monument ken EDSA Shrine ket saan a maysa a ‘freedom park’ isut gapuna a naiget ti pannakaipawil kadagiti nasao a lugar a pakaisayangkatan kadagiti nasao nga aktibidad.
Kunana a rumbeng nga ammo dagiti raliyista dagiti pagannurotan ken suroten dagiti pagalagadan dagiti nabayagen nga agiwaywayat ti tignay protesta.
Kabayatanna, mainaig kadagiti saan a makaala kadagiti permit, inpanawagan ni Nartatez a dagiti agiwayat ti tignay protesta nga awanan ti maiyannatop a dokumento ket saanen nga ituloy dagiti programada.
Iti baet a daytoy ti kiddaw ti nailian a pulisia ket inpasigurado met ti Acting Philippine National Police Chief a nakasaganada ken agtultuloy ti panangiyimplimentar ti maximum tolerance para kadagiti grupo nga ad-adda a pilienda nga ag-rally nga awan ti permit-da.
Iti agdama, nakabantayen ti pulisia para iti maiwayat a tignay protesta iti Luneta inton sumaruno a Domingo, Septiembre 21 kas panawagan dagiti progresibo a grupo kontra iti korapsion.
