LAOAG CITY – Naminpinsan a nauram ti maysa a balay iti paset ti Barangay Daquioag iti ili ti Marcos.
Segun ken ni Mr. Paulino Tamayo, kabsat ti nauraman ti balay, iti oras ti alas-dos ti parbangon ket agtataol dagiti aso ken adda dagiti aggiikkis ngem inpagarop na nga adda dagiti agririri isut gapuna a saan a rimuwar a dagus iti balayna.
Nupay kasta, napan ti ulitegna tapno ipakaammo kenkuana ti pannakauram ti balay ti kabsatna.
Inlawlawag ni Tamayo a tallo ti annak ti kabsat na, ngem ti kaanakan na a sekondarya ket agyan iti balayna idinto a dagiti dua ket agpadan a kolehiyo isut gapuna nga agkaskasera da ditoy ciudad ti Laoag ken awan da idi napasamak ti uram.
Kuna na nga awan pulos ti nasalbar a kagamitan iti nauram a balay ti kabsat na, karaman ditoyen dagiti gamit iti panageskwela ti maysa a kaanakan na.
Inbatad ni Tamayo a basar iti Bureau of Fire Protection ket wiring partikular ti nakasaksak a wifi ti possible a nangrugyan ti apoy.
Inpetteng na a nabayagen ti wifi iti balay ti kabsatna ken uray iti mismo a balay da ket saan da met nga ik-ikkaten ti saksakan ti wifi da isut gapuna a masdaaw da iti napasamak.
Mainaig iti daytoy, saan met a maibaga ni Tamayo no nairanta wenno saan ti pannakauram ti balay ti kabsatna, ngem nadakamat nga addan ti pannakauram ti ridaw da, addan sumagmamano a tawen ti napalabas.
Kabayatann, kuna ni Tamayo a dagiti laeng linaon a kagamitan, karaman dagiti appliances iti nauram a balay ket mapatta-patta nga umabot iti 100 a ribo a pisos ti balorna.
Gapu iti daytoy, agpanpanawagan ni Tamayo kadagiti naayat ti panagpuspuso na a tulungan da koma ti kabsat ken dagiti kaannakan na a napukawan ti balay gapu ta awan pulos ti nasalbarda.
