LAOAG CITY – Nakapungtot ni Senator Joel Villanueva iti panagbalin na kas “punching bag” tunggal adda dagiti mapaspasamak nga anomalya iti flood control projects iti ili na idiay Bulacan.
Naglikudan met ti senador ti alegasyon nga adda ti pakainaigan na iti P600-milyon insertion iti unprogrammed funds idi 2023 national budget.
Inrakurak daytoy ti Senador kalpasan a kinumpirmaran ni Senate President Pro Tempore Panfilo Lacson a naddaan ti P600 milyon a pondo para iti Bulacan flood control projects iti 2023 unprogrammed budget.
Iti panagbilang ni Lacson ket adda ti pito agingga iti walo nga items nga agbalor ti P75 milyon iti tunggal maysa nga adda ti pakabuklan a balor a P600 milyon.
Immunan nga inbutaktak ti dati nga assistant district engineer ti Department of Public Works and Highways (DPWH) a ni Brice Hernandez a nagkiddaw ti 30 percent ni Villanueva iti P600-M insertion.
Mamati met ti Senador nga adda ti mangperperdi ti nagan na para iti 2028 elections.
Nagpanawagan ti senador iti publiko a saan a patpatien dagiti agwarwaras a peke a damag mainaig iti nasao nga isyu.
