LAOAG CITY – Inbatad ni Mayor Cresente Garcia iti ili ti Burgos a marikna dan ti epekto ti bagyo Nando.
Kuna na nga iti agdama ket makapaspasar dan ti napigsa ti angin aglalo kadagiti coastal barangay.
Segun kenkuana, ingalot dagiti residente dagiti gamit da a pagkalap partikular ti bilog ken uray ti galba dagiti babbalay da ket nakagaloten tapno masigurado a saan a basta maitayab no ad-adda pay a kumaro ti sitwasyon.
Mainaig iti daytoy, inpakaammo ti mayor a nagpukaw metten ti supply ti kuryente da nangrugi itay agarop alas-dos ti malem.
Inpasigurado ti mayor a makaanay ti Family Food Packs da a maibunong kadagiti residente a kangrunaan a maapektaran ti bagyo.
Innayon na nga iti agdama ket naiget ti panagmonmonitor da iti sitwasyon iti ili ti Burgos.
Inbalakad ti mayor kadagiti umili nga ipangpangruna ti panangsalaknib ti bagi no panawen ti kalamidad ken no madlaw a kumarkaron ti sitwasyon ket agturongen kadagiti evacuation centers.
