LAOAG CITY – Agtultuloy ti pannakaitantan ti operasion dagiti European airport kalpasan ti weekend cyber-attack kangrunaanna iti Brussels airport idiay Belgium.
Sumagmamano kadagiti maibilang a busiest airports ti Europa ti nangbusbos iti napalabas a sumagmamano nga aldaw a mangikagkagumaan a mangisubli iti normal nga operasion kalpasan ti cyber-attack idi Biernes a nakaapektar iti automatic check-in ken boarding software.
Dakkel ti panagbaba iti pannakaapektar idiay Berlin ken London Heathrow idi Domingo ngem nagtalinaed dagiti pannakaitantan ken pannakakanselar kadagiti flight.
Iti maysa nga statement, inrakurak ti Collins Aerospace, software provider nga addan iti final stage ti pannakakumpleto kadagiti kasapulan a software updates.
Basar iti Brussels Airport, ikagkagumaan ti service provider iti panangsolbar iti nasao nga isyu ngem nagtalined a saan pay a masinunuo no inton ano a maresolbar daytoy.
Mainaig iti daytoy, naikiddaw kadagiti airlines ti pannakakanselar iti agarup 140 manipud iti 276 nga scheduled outbound flights.
Dimmawat met ti panagpadispensar ti Heathrow kadagiti pasahero a nakapasar ti pannakaitantan ti biahe dagitoy.
Inrakurak ti pannakangiwat ti United Kingdom National Cyber Security Centre a manarimaan ti pannakikoordinarda iti Collins Aerospace, dagiti naapektaran nga United Kingdom airports, Department for Transport ken law enforcement para iti naan-anay a pannakaawat iti nagbalin nga impact ti insidente.
Kabayatanna, naammoan a ngimmato iti 600% kadagiti naglabas a tawen ti cyberattacks iti aviation sector kas maibasar iti kaudian a report manipud iti French aerospace company a Thales.
