LAOAG CITY – Agtultuloy ti panagngato iti kaso iti Human Immunodeficiency Virus wenno HIV ditoy probinsia.
Daytoy ti inpakaammo ni Dr. Rickson Balalio, ti mangidadaulo iti Provincial Health Office.
Segun kenkuana, nangato latta iti kaso iti Human Immunodeficiency Virus ditoy probinsia isut gapuna nga agtultuloy iti panangiyuswat da iti libre nga screening.
Kunana a malaksid iti screening ket dakkel pay a makatulong iti information dissemination tapno maimpormaran dagiti umili no kasano a taripatwen a nasayaat ti bagi tapno malapdan ti panagngato ti kaso iti nasao a virus.
Kabayatanna, agtultuloy ti pananggutigot ni Balalio iti publiko nga amwen ti estado da maipanggep iti nasao a virus babaen iti panagpa-screen dagitoy.
Innayon na nga adda ti libre nga agas a maipaay kadakuada ken silulukat dagiti treatment hub ditoy probinsia, kas iti Mariano Marcos Memorial Hospital and Medical Center iti ciudad ti Batac
Maipalagip nga imnunan nga inbatad ni Balalio a dagiti agtawen ti 15 agingga iti 24 ti kaadoan nga agpospositibo iti sakit, partikular dagiti lallaki a makinanaig iti pada da a lalaki .
