LAOAG CITY – Nabayagen a maipatpatungpal ti Zero Balance Billing iti Mariano Marcos Memorial Hospital and Medical Center iti ciudad ti Batac.
Daytoy ti inbatad ni Dr. Jose Orosa III, Chief of Medical Professional Staff iti nadakamat nga ospital.
Segun ken ni Orosa, sakbay pay ti maikapat nga State of the Nation Address ni Presidente Ferdinand Marcos Jr. a nangirakurakan na ti pannakaipatungpal ti zero balance billing ket addan ti innem a tawen nga ipatpatungpal da daytoy iti Mariano Marcos Memorial Hospital and Medical Center.
Inpakaammo na a sipud idi maikapat nga State of the Nation Address ket addan ti 22 a ribo a pasyente a nabenepisyaran iti zero balance billing a daytoy ket agbalor ti 153 a milyon a pisos.
Innayon na a ti average a tultulungan ti gobierno iti babaen ti zero balance billing ket 50 a milyon.
Malaksid iti zero balance billing ket sabali pay ti Medical Assistance to Indigent and Financially Incapacitated Patients program nga ipatpatungpal ti nadakamat nga ospital.
Inrakurak ni Orosa a sipud pebrero agingga iti setyembre ket addan ti 44, 200 a pasyente a nabenepisyaran ken agbalor daytoy iti 105.4 milyon a pisos.
Inbatad na a regular nga ipapaay daytoy ti gobierno tapno libre ti panangipaay ti serbisyo ti Mariano Marcos Memorial Hospital and Medical Center.
