LAOAG CITY – Umaboten iti P1.7 billion ti balor dagiti nadadael iti sektor ti agrikultura ken imprastruktura kalpasan ti nagsasaruno a bagyo a timmama iti pagilyan ita a bolan ti Setyembre.
Basar iti datos ti National Disaster Risk Reduction and Management Council (NDRRMC), nasurok a P914 million ti balor dagiti nadadael iti agrikultura idinto a nasurok a P822 million met iti imprastruktura gapu iti bagyo Opong, Nando ken Marisol, kasta pay iti epekto ti angin abagat.
Inbatad ti National Disaster Risk Reduction and Management Council a ti kaadoan ti nadadael iti benneg ti agrikultura ket iti Cagayan Valley wenno Region 2 nga adda iti P807 million, sumaruno ti Western Visayas nga addaan ti P43 million, Cagayan Valley nga addaan met ti nairekord a P4.64 million perdisyon ket agarop 500 a ribo a pisos iti Mimaropa.
Naikabil met iti intero a probinsiya ti Cagayan iti state of calamity, karaman iti ili ti Pagudpud iti Ilocos Norte, Ibajay iti Aklan ken Pagalungan iti Maguindanao del Sur.
