LAOAG CITY – Inrakurak ti Philippine National Police (PNP) a dagiti menor de edad a natiliw iti napasamak a naranggas a tignay protesta kontra iti korapsion idi Setiembre 21 ket nasken a maipadalan iti rehabilitation ken counseling.
Inbatad ni Philippine National Police acting chief Lt. Gen. Jose Melencio Nartatez Jr., 55 a menor de edad ken 25 a nataengan ti naarestar ket nawaya-wayaan kas maiyataday iti linteg partikular iti Juvenile Justice and Welfare Act.
Inlawlawag ni Manila Mayor Isko Moreno a dagiti menor de edad ket masapul nga ikabil dagitoy iti Manila Department of Social Welfare tapno mangiwayat ti community service kas ti cleanup drives kas paset ti rehabilitation, reintegration ken diversion-da.
Inpaganetget ni Nartatez a napateg nga adda ti mapagsungbat ngem kasapulan ti husto a panangbayabay ken rehabilitasyon para kadagiti agtutubo.
Ginutigot ti Philippine National Police dagiti nagannak ken ti lokal nga opisial nga agbalin nga aktibo iti panangtarabay kadagiti agtutubo tapno maliklikan kadagiti kapada nga insidente iti masangoanan.
Para met kadagiti 25 a nataengan a naarestar, inbilin ni Nartatez a makikoordinarda a naimbag kadagiti imbestigador kadagiti prosekusyon tapno masigurado ti umiso a pannakaipila ti kaso.
