LAOAG CITY – Umabot iti 6.9 bilyon pesos ti balor ti iligal a droga a nakumpiskar ti Philippine Drug Enforcement Agency (PDEA) iti dua nga aldaw nga insayangkat da nga operasyon.
Segun kenni Atty. Joseph Fredrick Calulut, pannakangiwat ti Philippine Drug Enforcement Agency, ti kaudian ket ti pannakadiskubre da iti naruar a tea bag a naglaon iti maipagarop a shabu iti maysa a pribado a sanikua iti ili ti Labrador, iti probinsya ti Pangasinan.
Inbatad na nga awan ti natiliw da nga indibidual iti nasao a lugar ngem mangiyuswat da latta ti follow-up operation tapno maamoan no siasinno pay dagiti kadua dagiti ummuna metten a naarestar a dua nga indibidual.
Kunana a basar iti imbestigasyon da ket adda ti koneksyon dagiti dua nga inyuswat da nga operasyon nangruna ket ginatang dagiti dua nga ummunan a natiliw ti sanikua a nakadiskubrean da idi rabii.
Maipalagip nga iti napalabas nga aldaw ket natiliw ti agtawen ti 40 a Chinese national ken residente ti Paliparan 3 iti Cavite ken agtawen ti 54 a ni alyas “Gardo” a residente ti Mampang, Zamboanga City iti Zamboanga Del Sur.
Mainaig iti daytoy, inbatad na nga iti panagmonitor da kadagiti ummunan a natiliw ket maipagarop a mangal-ala da iti iligal a droga iti natiliw met a Chinese national ken Pilipino agingga a nangiyuswat da ti operasyon.
Kadua ti Philippine Drug Enforcement Agency iti operasyon ti Philippine National Police (PNP), National Bureau of Investigation (NBI) ken dadduma pay nga ahensya.
Iti agdama, kuna ni Calulut a manarimaan ti panangberpikar da no agpada dagiti naala nga iligal a droga iti kabaybayan iti kallabes ken iti nakumpiskar da iti nagsaruno nga operasyon da. Innayon na a manarimaan ita ti imbestigasyon da tapno maamoan no naggapoan dagiti iligal a droga a nakumpiskar da iti probinsya ti Pangasinan.
