LAOAG CITY – Nasurok a P115 a bilyon ti naduktalan a nailatang para kadagiti maibilang kas “shadow” wenno saan a nalawag a proyekto iti flood control ita a 2025.
Daytoy ket basar iti panagadal ti University of the Philippines National College of Public Administration and Governance (UP-NCPAG).
Naduktalan iti panagadal a ti “shadow” flood control budget, a mangibilang kadagiti proyekto a saan a karaman iti opisyal a Flood Management Program (FMMP), ket agtultuloy ken dakkel ti nagbalin a nagngatoan na iti panagtulid dagiti tawen, manipod iti P81.552 bilyon idi 2022 ket nagbalin a P115.262 bilyon iti 2025.
Basar iti University of the Philippines National College of Public Administration and Governance, rumbeng a tingitingen a naimbag ti agpada a lebel ti dadduma pay a paset ti General Appropriations Act (GAA) nga adda ti pakainaigan iti alokasyon para iti Disaster Risk Reduction and Management (DRRM).
Inpetteng da nga iti napalabas a 15 a tawen, nakaawat ti Department of Public Works and Highways (DPWH) ti pakabuklan a P7.9 trilyon, ti kadakkelan a pondo no ikompara iti dadduma nga ahensya.
Iti baet daytoy, nagtalinaed a naiget ti epekto dagiti didigra wenno kalamidad ken ti panaglayos iti pagilian.
Basar iti datos, nalawag a ti problema ket saan laeng a kinakurang ti pondo no di ket iti panangiwanwan, transparency ken accountability.
Inlungalong ti University of the Philippines National College of Public Administration and Governance a tapno masolusyunan dagiti isyu ket masapol a maipalawa ti Independent Commission on Infrastructure ti imbestigasyon da; ipatungpal ti Executive Branch dagiti systemic reforms iti panangiwanwan dagiti proyekto; iyakar ti kongreso dagiti responsibilidad iti disaster risk reduction iti maysa a dedicated agency; ken papigsaen dagiti oversight agencies dagiti mekanismo ti accountability iti budget.
