LAOAG CITY – Inrekomendar ti Philippine Institute of Volcanology and Seismology (PHIVOLCS) ti maysa a five-meter zone of avoidance iti Bogo Bay Fault a nangrugian ti magnitude 6.9 a gingined idiay Bogo City, Cebu idi Setiembre 30.
Naduktalan ti Philippine Institute of Volcanology and Seismology idi Oktubre 3 ti fault line a nagrugian ti napigsa a gingined idiay Cebu nga inawagan a Bogo Bay Fault.
Ti fault line ket masarakan iti Sitio Looc iti Barangay Nailon.
Naobserbaran dagiti eksperto ti fault scarps, dagiti rikki wenno abut ken babassit a pressure mound iti uneg ti 2-meter-wide deformation zone iti lugar.
Basar iti kaudian a datos ti Philippine Institute of Volcanology and Seismology, nakairekordda ti pakabuklan a 7,027 nga aftershocks a dumandanon iti magnitude 5.1.
Kabayatanna, ti naipadamag a bilang dagiti natay gapu iti gingined ket 72 basar iti National Disaster Risk Reduction and Management Council (NDRRMC).
