LAOAG CITY – Inrekomendar ti International Criminal Court a tingitingen ti tallo nga eksperto iti forensic psychiatry, neuropsychology, ken behavioral neurology ti agdama a kasasaad ni dati a Presidente Rodrigo Duterte a sumango iti panangtingiting para kadagiti maipagarup a krimen gapu iti panangipatungpalna iti nadara a gubat kontra iti ilegal a droga.
Ti rekomendasion ti prosecutors ket rimmuar iti public redacted a bersion ti “Prosecution’s Observations on the ‘Registry Submission of a Shortlist of Medical Experts” idi Setiembre 18, 2025.
Ti siam a panid a dokumento manipud iti opisina ti Prosecutor ket inparuk-at ti International Criminal Court idi Oktubre 9 ken pinirmaan ni Deputy Prosecutor Mame Mandiaye Niang.
Segun iti Prosekusion, tallo nga eksperto ti nangipeksa ti kabaelanda a mangipaay kadagiti serbisioda.
Nakailanad iti dokumento a kinontra ti Prosekusion ti maysa a potensial nga eksperto nga inprisentar ti Depensa gapu ta ti appointment-na ket mabalin nga agbalin nga isyu kas “potensyal a bias.”
Iti agdama, nakabalud ni Duterte iti Hague Penitentiary Institution wenno Scheveningen Prison kadagiti kaso mainaig iti gubat kontra iti droga ti administrasion a nakatayan iti sumurok innem a ribu a drug suspect kadagiti operasion ti pulisia.
