LAOAG CITY – Inbutaktak ni Health Secretary Teodoro “Ted” Herbosa a P100 million laengen ti nabatbati a quick response fund (QRF) ti Department of Health kalpasan ti nagsasaruno a kalamidad.
Segun iti sekretario, nagkiddawdan ti nayon a pundo iti Department of Budget and Management (DBM), kas kapada ti inaramid ti Department of Social Welfare and Development (DSWD) ken Office of Civil Defense (OCD).
Inlawlawag ni Herbosa nga adda ti limitasion ti panagusar ti QRF base iti pagannurotan ti Commission on Audit (COA) a daytoy ket saan a mabalin a garawen no awan ti naideklarar nga state of calamity.
Nupay kasta, dinakamat ti sekretario a mabalinen nga usaren ti pundo uray awan pay ti kalamidad iti babaen ti Republic Act No. 12287 wenno ti “State of Imminent Disaster” a mabalin a pangibasaran dagiti datos manipud iti Philippine Atmospheric, Geophysical and Astronomical Services Administration, PHIVOLCS ken National Disaster Risk Reduction and Management Council.
