LAOAG CITY – Nagtalinaed a nakarikep pay laeng iti publiko ti Louvre Museum idiay Paris kalpasan ti napasamak a panagtakaw.
Iti insidente, naala dagiti suspek ti walo a naidumduma ken nababalor nga alahas.
Basar iti imbestigasyon, ingeddan dagiti suspek ti panaglukat ti museum iti alas-9:30 iti bigat.
Nagusar dagiti uppat a suspek ti lugan nga addaan ti mechanical lift tapno makastrek iti Galerie d’Apollon iti nagbaetan ti balcony asideg ti River Seine.
Dua kadagiti suspek ti nakastrek babaen iti panangdadael da iti tawa usar ti power tools.
Naamoan a binutbuteng da dagiti guwardiya sakbay da a dinadael ti dua a display a naglaon kadagiti alahas.
Inaramid dagiti suspek daytoy iti uppat laeng a minuto ken naglibas da usar ti dua nga scooters.
Sumagmamano kadagiti intaray da ket ti emerald necklace ken maysa a pares ti aritos ni Empress Marie Louise; brooch a mabigbigbig kas “reliquary brooch”; Tiara ken brooch a kukua met ni Empress Eugene, ti asawa ni Napoleon III ken maysa a tiara, kuwentas ken single earing manipud iti sapphire set a naggapo kenni Queen Marie-Amelie ken Queen Hortense.
Kabayatanna, agtultuloy pay laeng ti imbestigasyon dagiti otoridad iti nasao nga insidente.
