LAOAG CITY – Inpakaammo ni Senador Panfilo “Ping” Lacson a maiyuswat ti sumaruno nga hearing ti Senate Blue Ribbon Committee intono Nobiembre 14, 2025.
Segun kenkuana, maimbitaran ti “very important witness” a mangilawlawag kadagiti isyu a mapagsasaritaan iti imbestigasion.
Nupay saan pay a nainaganan ti testigo, inpasigurado ni Lacson nga adda ti direkta nga ammo na kadagiti banag a mainaig iti panagkunniber.
Naamoan a maimbitaran met iti hearing ni retired T/Sgt. Orly Guteza.
Ti hearing ket paset ti agtultuloy nga imbestigasion ti komite kadagiti alegasion nga iregularidad iti pannakausar ti pondo ti gobierno.
Nagpanawagan met ni Lacson ti publiko a tutukan da a naimbag ti hearing gapu iti kinakaro dagiti isyu a mapagsasaritaan.
Innayonna a napateg ti pannakipaset dagiti umili tapno mapagsungbat dagiti nairaman iti korapsion.
Ti sumaruno a pannakadengngeg ti kaso ket manamnama a mangted lawag kadagiti saludsod a nanglikmut iti isyu.
