LAOAG CITY – Pilaan ni Vice Mayor Rey Carlos Farinas ti kaso admistratibo ni Pol. Lt. Col. Andrew Rabang, ti Chief of Police ditoy ciudad ti Laoag.
Daytoy ket gapu iti nagbalin a sungbat ni Rabang babaen iti suratna nga arigna insulto iti parte ti bise mayor.
Segun iti bise mayor, ad-adda koma pay a naaprisyarna no inbaga lattan ti chief of police a saan dan nga uliten ti inaramid da idi nagkita da kabayatan ti flag raising ceremony idi lunes, Oktubre 27.
Inbatad ti bise mayor a no dadduma ket saan a napintas ti panagawat da iti linteg isut gapuna a kasapolan met a maikorehir dagitoy.
Kunana a no kayatda a maalay-ayan ti trapiko kabayatan ti selebrasyon ti Teacher’s day iti kallabes ket saan da koma a pinaserraan amin a kalsada iti aglawlaw ti centennial arena.
Innayon na a ti panangipila na ti kaso kontra iti nasao a chief of police ket tapno maipakita no siasinno iti usto kadakuada.
Immunan nga inbatad ni Vice Mayor Fariñas a iti nagbalin a sungbat babaen iti surat ni Pol Lt. Col. Andrew Rabang, ti chief of Police ditoy ciudad ti Laoag maipanggep iti panangdillaw na iti masansan a panangipatungpal ti Philippine National Police ti pannakapaserra dagiti sumagmamano a kalsada ditoy ciudad nga awan ti pammalubos iti konseho ken iti local executive.
Inbatad iti Bise Mayor a nakapalaon ti surat iti nasao nga hepe nga agduma ti reroute ken temporary closure no sadinno a ti inaramid da laeng ket wagas a panangimanihir kadagiti behikulo ken tapno maliklikan ti nairot a trapiko.
Nailanad pay iti surat ti hepe ti pulisya a naipakaammo ti nasao nga aktibidad babaen iti concerned office ngem awan iti aniaman a nagbalin a tignay da isut gapuna nga inaramid da laeng ti trabaho da pakairaman iti seguridad, panangiwanwan ti trapiko nga awan ti aniaman nga intension a pannakaistorbo dagiti biahero.
Segun iti bise mayor, dagita sarita a nakailanad iti surat ket arigna pannakainsulto kenkuana gapu ta ti kayat na laeng ket mapalagipan dagitoy iti madi nga ar-aramiden da.
Pinadas ti news team ti Bombo Radyo Laoag nga alaen ti takted ti chief of police ditoy ciudad ti Laoag ngem agpapan maisursurat daytoy a damag ket saan pay a simmungbat iti tawag kenkuana.
