LAOAG CITY – Inlawlawag ni Ms. Maria Theresa De Vega, Undersecretary for Administration iti Department of Foreign Affairs (DFA) no apay nga inrekomendar na kenni Pres. Ferdinand Marcos ti pannakaipatakder ti Konsulado idiay Busan, South Korea.
Segun kenni De Vega, babaen iti daytoy ket saanen a kasapulan dagiti overseas Filipino Workers iti nasao a rehiyon ti agbyahe iti innem nga oras tapno mapan iti embahada ti Pilipinas idiay Seoul.
Inbatad na nga idi nagserbi kas ambassador ti Pilipinas idiay South Korea, nakita na ti umad-ado a bilang dagiti Pilipino iti nasao a rehiyon.
Basar pay kenni De Vega, umaboten iti 20 a ribo a Pilipino ti adda idiay Busan ken kabangibang na a rehiyon, kasta met nga adda dagiti seafarers iti Busan Port.
Kunana a babaen iti Philippine General Consulate iti Busan ket maipaayan na dagiti Pilipino iti labor related services, mainaig iti passport ken dadduma pay.
Ti Busan ket adda iti ungto ti Korean Peninsula ken maysa a napateg a sentro iti nadakamat a pagilyan.
Naamoan a dagiti mangimanehir to iti Konsulado idiay Busan ket aggapo ditoy Pilipinas.
