LAOAG CITY – Nasurok 400 a mannalon iti ili ti Currimao ti apektado iti saan pay a masinunuo a sakit ti pagay.
Segun kenni Engr. Erickson Biag, Municipal Agriculturist, ti ammo da ket napintas ti pagbanagan ti apit dagiti mannalon ita a cropping season ngem iti katinggaan ket saan metten nga agdawa dagiti pagay.
Daytoy ti rason nu apay nga insigida nga inkunsoltarda daytoy iti Department of Agriculture ken dagiti dadduma pay nga ahensya a mabalin a makatulong kadakuada.
Kunana a saan laeng a dagiti didigra a kas ti bagyo ti nakaapektar kadakuada itay kallabes ngem dakdakkel a perwisyo ti agdama a paspasaran da.
Innayonna a nangisayangkat da ti open forum tapno maamoan pay no ania dagiti problema dagiti mannalon ken dagus a masulosyonan ti ti lokal a gobierno babaen ti panangidaulo ni Mayor Boyet Quilala.
