LAOAG CITY – Lima a drug personality ken dua a wanted person ti natiliw dagiti drug enforcement unit iti Philippine National Police ditoy probinsya babaen ti insayangkat ti llocos Norte Police Provincial Office nga Intensified Anti-criminality operation sipud idi Oktubre 29 agingga iti Nobyembre 3 ita a tawen.
Manipod kadagiti naisayangkat nga operasyon iti ili ti San Nicolas, Marcos ken ditoy ciudad ti Laoag ket adda ti nakumpiskar dagiti otoridad a 19.2 gramo ti shabu.
Malaksid iti daytoy, umabot met ti 18 ti naisuko a paltog manipud kadagiti nagduduma a municipal police station ditoy probinsya.
Inmunan nga inlawlawag ni Police Col. Joemar Labiano, ti Provincial Director iti Ilocos Norte Police Provincial Office no apay nga agsasaruno dagiti maiwaywayat nga Anti-Illegal Drug Buy-bust Operation kadagiti nagduduma nga ili ken siudad ditoy probinsia.
Segun kenkuana, dagiti kangrunaan a matiltiliw da ket Street Level Individual wenno dagiti naggapu iti pagbaludan a naglabsing iti Republic Act No. 9165 wenno ti Comprehensive Dangerous Drugs Act of 2002.
Inbatad na a ti met laeng nagibutaktak kadakuada ket dagiti kakadua dagiti suspek nga agar-aramid iti iligal nga aktibidad, rason nga adda dagiti maiyuswat a follow-up operation kontra kadagiti drug personality ditoy probinsya.
