LAOAG CITY – Nangidasar ni Konsehal John Michael Fariñas, ti chairman ti Committee on Environment, ti maysa a gakat a mangmandar kadagiti indibidwal nga akopen nga insigida ti rugit dagiti taraken da nga aso, pusa ken dadduma a dingwen kadagiti pampubliko a lugar ditoy ciudad ti Laoag.
Kunana nga ado dagiti taraken nga aso aglalo dagiti walang nga agrugit lattan iti nagduduma a lugar ken mabaybayan a nakatiwangwang.
Gapo iti daytoy, inbatad na a saan a napintas a kitkitaen ken mabalin a makangitunda ti saan a napintas nga epekto daytoy iti salun-at gapo ta ti rugit dagiti dingwen ket mabalin a paggapwan dagiti bacteria kas ti e-colli ken salmonella kasta pay a mangipaay ti polusyon iti aglawlaw babaen ti saan a makaay-ayo nga angot.
Segun kenni Fariñas, babaen iti indasar na a gakat ket mapilitan dagiti tattao nga agbalin a responsable a pet owner babaen ti panangakop nga insigida ti rugit dagiti taraken ken maikabil daytoy iti umiso a pakaikabilan na.
Kabayatanna, inbatad ni Dr. Samantha Licudine, ti mangidadaulo ti City Verterinary Office a basar iti obserbasyon na ket ado dagiti residente ditoy ciudad a mangigalgalot kadagiti taraken da nga aso ngem palusposan da dagitoy tapno mapan agrugit wenno umisbo.
Kunana a saan a napintas daytoy a practice dagiti tattao aglalo no saan nga akupen nga insigida dagiti a rugit da.
Inpakaammo ni Licudine a ti maipataw a pannusa kadagiti saan a mangsurot ti pagannurutan ket maibasar iti Oplan Dalos code a ti 1st offense ket saan a nababbaba ngem sangaribo a pisos ken mabailod iti saan a sumurok ti lima nga aldaw; ti 2nd offense ket mamulta ti saan a nababbaba ngem dua a ribu a pisos ken maibalod iti saan a sumurok ti sangapulo nga aldaw ken ti 3rd offense ket mamulta ti tallo a ribu a pisos ken maibalod iti saan a sumurok ti 15 nga aldaw.
Ti nasao a gakat ket naaprobaran iti maikadwa a pannakaibasa na kabayatan regular session iti konseho ditoy ciudad ti Laoag.
