LAOAG CITY – Inrakurak ni Executive Secretary Lucas Bersamin a saan nga otomatiko nga isuko ti gobierno ti Pilipinas iti International Criminal Court (ICC) ni Senador Ronald “Bato” Dela Rosa no bilang pudno nga adda ti nairuar nga arrest warrant kontra kenkuana.
Inaramid ti Executive Secretary ti rakurak kalpasan a nakiddaw ti reaksion iti panangibutaktak ni Ombudsman Jesus Crispin Remulla nga addan ti inparuk-at ti International Criminal Court nga arrest warrant kontra iti Senador nga adda ti pakainaiganna iti war on drugs ti napalabas nga administrasion Duterte no sadinno nga isuna ti hepe ti nailian a pulisia a nangipatungpal ti nasao a kampania kontra iti iligal a droga.
Inbatad ni Executive Secretary Bersamin, posible nga adda ti inruar nga arrest warrant ti international tribunal kontra iti agpanpanday linteg ngem kasapulan pay daytoy a mai-transmit iti babaen ti International Criminal Police Organization (Interpol).
Inlawlawag ti Malacañang official a saanen a matulad pay ti napasamak ken ni dati a Presidente Rodrigo Duterte ti agbalin a proseso iti panangarestar iti Senador no bilang nga agbalin a valid ti arrest warrant.
Kunana a daytoy ket kalpasan a nangiyisyu ti Korte Suprema ti baro a pagannurotan mainaig iti extradition a mangibilbilin para iti panagdengngeg nga umuna ti kaso iti korte ti Pilipinas sakbay nga ikabil iti sabali a pagilian ti maysa nga indibidual a subject iti extradition.
