LAOAG CITY – Nasugatan ti akin-kannigid a paset ti buksit ti maysa a lalaki kalpasan a binagkong ti ama ti nakariri na iti Brgy. Gabut Norte iti ili ti Badoc.
Ti biktima ket agtawen ti 23, baro, construction worker, idinto ti suspek ket agtawen ti 56, naasawaan, mangngalap ken agpada dagitoy a residente iti nadakamat a barangay.
Basar iti imbestigasyon ti Philippine National Police, naggiinom ti biktima iti balayda kadwa na ti dua a kabarangayan da.
Nupay kasta, naaddaan ti saan a nagkinnaawatan ti biktima ket ti maysa a kinainom na no sadinno nga iti panagawid ti nakariri na ket sinurot paylaeng ken nagprobokar.
Gapu iti daytoy, rimuar iti balayda ti ama ti nakariri ti biktima nga adda ti iggem na a kutsilyo ket ditoyen a binagkong na a nakatamaan ti akin-kannigid a paset ti buksitna.
Naitaray ti biktima iti Karmelli Clinic and Hospital iti ili ti Pinili babaen kadagiti kabagyan na ngem naiyakar metlaeng iti Mariano Marcos Memorial Hospital and Medical Center iti ciudad ti Batac.
Kabayatanna, naarestar met a dagus dagiti otoridad ti suspek ken iti agdama ket nagtalinaed iti Philippine National Police iti ili ti Badoc kabayatan a maisagsagana ti kaso a maipila kontra kenkuana.
