LAOAG CITY – Dinutukan ni Presidente Ferdinand Marcos Jr. ni Department of Foreign Affairs (DFA) Secretary Ma. Theresa Lazaro kas Special Envoy tapno idaulwan dagiti addang para iti nainkapiyaan a panangsolbar ti krisis iti Myanmar, kas panagsagsagana ti panangidaulo ti Pilipinas iti Association of Southeast Asian Nations (ASEAN) intono 2026.
Iti official launching ti ASEAN Chairmanship ti Pilipinas, inpetteng ni Presidente Marcos nga agtultuloy nga idaulwan ti pagilian ti gagem para iti kapya, kinatalged iti babaen ti dayalogo, panangtungpal ti international laws ken ad-adda a napapigsa a kooperasyon kadagiti isyu para iti seguridad, tradisyonal man wenno saan.
Inbatad ti presidente a ti gagem a maaddaan ti regional peace and stability ket namongangay kadagiti pundasyon mainaig iti prinsipyo ti ASEAN, ti Treaty of Amity and Cooperation (TAC), ken ti United Nations Charter.
Inrakurak pay ti presidente nga agtalek a maannong ni Lazaro ti “konstruktibo, prinsipled, ken inklusibo a pangirigan iti panangsuporta kadagiti umili ti Myanmar, kas maiyataday iti mandato ken iti ASEAN Five-Point Consensus (5PC).
Ti 5PC, a pinatibker dagiti lider ti ASEAN idi 2021, ket agserserbi a roadmap para iti kapia iti Myanmar.
Daytoy ket bukbuklen ti dagus a panagpatingga ti kindamsak, konstruktibo a dayalogo para iti nainkapiyaan a solusyon, mediation nga idaulwan ti maysa nga ASEAN Special Envoy; Humanitarian assistance manipod iti ASEAN; ken ti pannakitinnulong ti Special Envoy iti amin nga opisyal ti Myanmar.
Innayon ni Presidente Marcos, a kagiddan ti panangidaulo ti Pilipinas iti ASEAN iti sumaruno a tawen ket ti pananglagip ti maika-50 nga anibersaryo ti Treaty of Amity and Cooperation, maysa a simbolo ti 50 a tawen a kooperasyon ken dayalogo iti rehiyon ken iti ruwar na.
