LAOAG CITY – Kalikagum ti ad-adda pay a pannakaparaniagna dagiti silaw iti Gilbert Bridge ditoy siudad ti Laoag.
Daytoy ket kalpasan nga adda dagiti sumagmamano a motorista ti mangibagbaga a nakudrep ti silaw iti nasao a rangtay.
Segun ken ni Mayor James Bryan Alcid, addan ti pannakikoordinarda iti city government maipanggep iti daytoy a banag.
Inbatadna a ti Department of Public Works and Highways ti addaan ti responsibilidad a mangiplastar dagiti kasapulan a mapasayaat iti Gilbert Bridge gapu ta ti nasao nga ahensia ti gobierno ti akin proyekto daytoy.
Nupay kasta, inlawlawagna a gapu kadagiti isyu ti proyekto ti Department of Public Works and Highways iti agdama ket naitantan dagitoy a proyekto.
Kunana a no saan man a matuloy ti pannakaparaniag ti silaw ket kitaenda no adda ti mabalin nga iyalokarda a pundo para iti daytoy.
Kuna ti Mayor a basar iti obserbasionna ket kabaelan met pay laeng dagiti silaw a mangipaay ti raniag kadagiti dumaldalyasat a motorista.
Innayonna a ti makitana a problema ita ket dagiti silaw iti bypass bridge a saan met a mabalin a garawen ti city government gapu ta kukua ti Department of Public Works and Highways – Regional Office daytoy isu a ti laeng maaramidanda ket aguray ti tignayda iti nasao a proyekto imprastraktura.
