LAOAG CITY – Pinangtaan ni Mr. Roberto “Bob” Diaz, ama ni Sangguniang Bayan Member Alfonso Diaz ni Mayor Shiella Galano iti ili ti Paoay.
Segun ken ni P/Capt. Jackson Sugayen, Hepe ti Paoay Municipal Police Station, nagturong iti Office of the Mayor dagiti agama ket ditoy a nagung-unget ti natataengan a Diaz kabayatan a kasarsaritana ni Mr. Amador Sadumiano, Municipal Administrator ti lokal a gobierno iti ili ti Paoay.
Inbatad ti ama ti Konsehal iti Municipal Administrator a kalikagumna a kasarita ti Mayor ken ti asawana maipanggep iti panangisubli ti ladawan ti loloda kadagiti nakapaskil a ladawan iti Rural Health Unit iti ili ti Paoay.
Inpettengna a no saanda a tungpalen daytoy a banag ket ad-adda a kumaro ti mapasamak iti masangoanan.
Mainaig iti daytoy, nag-privileged speech ni Konsehal Diaz iti session ti Sangguniang Bayan ita nga aldaw ti Lunes maipanggep iti napasamak.
Naammoan nga awan ti Local Chief Executive iti opisinana idi nagturong dagiti agama a Diaz.
Maipalagip a nagbinnalubal da Mr. Roberto “Bob” Diaz ken ni Mayor Shiela Galano iti napalabas nga eleksion.
Kabayatanna, nangipila ti Municipal Administrator ti kaso a Direct Assault kontra kadagiti agama a Diaz.
Iti agdama, ikarkarigatan ti Bombo Radyo Laoag News Team nga alaen ti komento ni Mayor Shiella Galano iti ili ti Paoay mainaig iti napasamak.
