LAOAG CITY – Agtultuloy ti imbestigasyon ti Bureau of Fire Protection iti ciudad ti Batac iti napasamak nga uram iti stock room ti College of Arts and Sciences iti Mariano Marcos State University iti ciudad ti Batac tapno maamoan no ania ti namonganayan iti insidente.
Daytoy ti inbatad ni Fire Senior Supt. Roxanne Parado, ti firemarshall iti Bureau of Fire Protection ditoy probinsya.
Segun ken ni Parado, dagus da a nakapagresponde gapu ta adda ti naka-standby a fire truck da iti Mariano Marcos State University para iti manarimaan nga aktibidad ti Department of Science and Technology (DOST) iti mismo a theatro ti unibersidad mainaig iti National Science and Technology Innovation Week.
Malaksid iti fire truck ti probinsya ket timmulong pay dagiti kameng ti Bureau of Fire Protection iti ciudad ti Batac ken iti ili ti Paoay, kasta met dagiti agbanbantay a kameng ti Philippine National Police ken dagiti security guards ti unibersidad.
Sinaludaran pay ni Parado dagiti security guards iti Mariano Marcos State University gapu ta inaramid da amin a kabaelan da tapno masebseban ti apoy usar dagiti fire extinguisher ti unibersidad.
Mainaig iti daytoy, inpakaammo ni Parado a karaman kadagiti nakita da iti stock room ket dagiti naruay a papel ken Christmas lights.
Nupay kasta, kuna ni Parado a saan da pay a maibaga no ania ti pudno a namonganayan iti uram.
Innayon na a nagpaot ti 30 a minuto sakbay nga indeklarar da ti fire out ken mapatta-patta nga agarop 5 ribo a pisos ti inisyal a balor dagiti nadadael iti napasamak nga uram.
Kuna pay ni Parado a mabalin a manayunan pay ti balor dagiti nadadael gapu ta manarimaan paylaeng ti imbentaryo da kalpasan ti insidente.
