LAOAG CITY – Kalikagum ti Sangguniang Panlungsod ditoy siudad ti Laoag a maiyatiddog ti oras a panag-duty dagiti traffic enforcers.
Segun ken ni Konsehal Jason Perrera, daytoy ket kalpasan a naobserbaranna nga iti oras ti alas sais ti rabii ket adda ti mapaspasamak a nairot a trapiko nangruna kadagiti intersections iti JP Rizal Street wenno iti sangoanan ti tiendaan, kalsada iti sangoanan ti dakkel a supermarket, Bacarra Road ken Bonifacio Street kangrunaanna iti sangoanan ti maysa a fast food chain.
Inbatadna a nagrigat nga agpabigay dagiti motorista kadagiti padada met laeng a motorista.
Inlawlawagna a nakitana pay nga awan ti traffic enforcers a naka-deploy tapno agmando ti trapiko gapu ta nakaawiden dagitoy kadagita nga oras.
Gapu iti daytoy, insingasing ni Konsehal Perrera nga imbes a malpas ti duty dagiti enforcers iti oras ti alas sais ket maiyalud-od daytoy agingga iti oras ti alas siete gapu ta mamati ti agpanpanday linteg a babaen kadagitoy a wagas ket makatulong tapno malimitaran ti nairot a trapiko ditoy sentro ditoy siudad ti Laoag.
Kabayatanna, kiniddaw ni Vice Mayor Rey Carlos Fariñas a maipaima daytoy a banag iti Chairman ti Committee on Transportation a ni Konsehal Jaybee Baquiran tapno makitaripnong iti Hepe ti Laoag City Police Station – Traffic Division ken makita ti agdama nga schedule dagiti traffic enforcers.
