LAOAG CITY – Inrakurak ni Gov. Cecilia Araneta Marcos a seryoso ti Provincial Government of Ilocos Norte ken Ilocos Norte Police Provincial Office a mangduktal dagiti adda iti likudan dagiti bomb threat kadagiti nagduduma nga unibersidad ditoy probinsia.
Segun kenkuana, dagiti mapaneknekan nga agar-aramid ken agiwarwaras ti bomb threat ket sumango iti nadagsen a pannusa.
Inbatadna a saan pay a palabsen dagiti otoridad uray menor de edad dagiti mabalin nga akin-aramid dagiti bomb threat ditoy probinsia.
Inlawlawagna a saan a mabalin a pagaangawan ti kinatalged dagiti estudiante ken dagiti mangisursuro a mabalin a pakaisagmakan ti biagda.
Mainaig iti daytoy, inladawan ni Gov. Marcos a no kasano ti kinaiget ti eropuerto iti panangipatungpal ti Anti-Bomb Joke Law ket kastoy met ti kinaiget iti pannakaipawil ti agiwaras ti bomb threat kadagiti pagadalan wenno unibersidad.
Maipalagip a nagsasaruno a bomb threat ti naawat dagiti pagadalan ditoy probinsia kangrunaanna iti Mariano Marcos State University, Data College of Laoag ken Northwestern University.
