LAOAG CITY – Naipaayen ti earned leave benefits dagiti nagretiro nga empleado ti Ilocos Norte Electric Cooperative wenno INEC.
Segun ken ni Mr. Perry Martinez, Acting General Manager ti Ilocos Norte Electric Cooperative, naalan dagiti maseknan a nagretiro nga empleado ti kooperatiba ti retirement benefits dagitoy a saan a nangipila ti adverse claim kontra iti Ilocos Norte Electric Cooperative.
Inbatadna a naudi ti earned leave kalpasan nga adda ti panangkuestionar iti panangkuntar no kasanoda a naurnong dagiti leave-da.
Inlawlawagna nga adda ti inkari ti napalabas nga administrasion ti Ilocos Norte Electric Cooperative kadagiti nagretiro nga empleado a maiyannatop a computation ti leave dagitoy.
Kunana a gapu kadagiti naglabas nga isyu iti pannakaimaton ti kooperatiba ket naapektaran ti retirement fund a nangitunda ti pannakaibayag ti pannakaipaay ti earned leave dagiti nagretiro nga empleado.
Innayonna a ti baro a computation ket basar iti pagannurotan ti National Electrification Administration idinto a ti dati a computation ket basar laeng iti napalabas nga administrasion ti kooperatiba.
Kabayatanna, naammoan a manipud iti pakabulan a 90 a bilang ket adda ti 24 kadagiti nagretiro nga empleado ti Ilocos Norte Electric Cooperative ti immunan a nakaawat ti earned leave benefits a nagpirma ti waiver.
