LAOAG CITY – Nagpanawagan ni President Ferdinand Marcos Jr. kadagiti Pilipino iti panangitandudo ti patriotismo ken panagayat iti pagilian bayat ti panangselebrar ti pagilian ti maika-162 nga anibersario ti pannakayanak ni Gat Andres Bonifacio ita nga aldaw, Nobyembre 30.
Iti statement, ginutigot ni Presidente Marcos ti publiko a pagbalinen nga ehemplo ni Bonifacio iti panangdependar ti dayaw ti nasyon ken itandudo dagiti pagsasyaatan babaen kadagiti aramid.
Inbalakad ti presidente a sipupuso nga ipatungpal dagiti pagrebbengan nga awan ti makaartap iti panagayat iti nakaiyanakn.
Ginutigot pay ni Marcos dagiti Pilipino nga aramiden ti pagrebbengan iti panangwaya-waya ti Pilipinas manipod iti panagbisin ken korapsyon.
Inpaganetget na dagiti nagbalin nga akem ni Bonifacio iti pakasaritaan ti Pilipinas kas rebolusyonaryo a banuwar a nangriing kadagiti Pilipino a lumaban para iti waya-waya.
Innayon ni Presidente Marcos a nupay addan ti nasurok a maysa a siglo ti napalabas, agtultuloy a mangipapaay ti inspirasyon iti tunggal maysa ken ti lagip ti Bonofacio ket mangpabileg iti determinasyon nga ipreserba ti panagwaywayas a nakilabananna idi nga isu met ti daydayawen ken ipapaayan ti importansya dagiti Pilipino.
Manipod iti nanumo a nagtaudan na agingga iti pannakaideklarar na kas “superhero”, inpakita ni Bonifacio a ti pudno a kinabanwar ket aggapo iti puso, kinatured, napudno a tarigagay ken iti nasin-aw a panagayat para iti nasyon.
Mangnamnama ni Presidente Marcos a ti panagbalin nga ehemplo ken panangidaulo ni Bonifacio ket agtultuloy a mangipaay ti inspirasyon kadagiti Pilipino nga agsalukag nga agturong iti maysa a natalna, nawaya ken progresibo a Pilipinas.
