LAOAG CITY – Immapela ni Presidente Ferdinand R. Marcos Jr. iti Armed Forces of the Philippines (AFP) nga agtalinaed nga agkaykaysa ken natibker iti responsibilidad da mangprotehir iti pagilian iti baet ti panagraira dagiti saan nga umiso nga impormasyon ken disimpormasyon a gagem na ti mangitunda ti panagwawara.
Inrakurak daytoy ti presidente iti maysa a tradisyunal a panagsasango iti maysa a lunch kadwa na dagiti kameng ti Armed Forces of the Philippines Council of Sergeants Major iti Malacañan Palace iti Maynila.
Iti mensahe ti presidente, kuna na a saan koma nga agpailuyos iti panagraira ti kinaswitik no di ket takderan ti kinapudno ken saan nga ipalubos a maimpluwensyaan ti peke a damag ken saan nga usto nga impormasyon ti panagmaymaysa ti militar ken administrasyon.
Dinayaw ni Presidente Marcos ti naimpapusoan a panagserbi dagiti kameng ti Armed Forces of the Philippines para kadagiti Pilipino, iti baet dagiti maipagarop a gandat a panangsubok ti relasyon ti administrasyon ken militar.
Agtalek ti presidente a saan a maiyaw-awan ti Armed Forces of the Philippines ken agtultuloy a makikaysa kenkuana tapno ilaban ken protehiran ti pagilian.
Ginutigot na met ti Armed Forces of the Philippines nga agtalinaed a napudno iti Konstitusyon, protehiran ti republika, ken salwadan ti kada Pilipino iti baet ti tension iti rehiyon, karit iti ekonomiya ken panagraira ti peke a damag.
Kabayatanna, inpasigurado ni Armed Forces of the Philippines Sergeant Major FCMS Feliciano Lazo nga agtalinaed a propesyonal, disiplinado, ken agkaykaysa dagiti soldado.
Iti mensahe ni M/Sergeant Lazo, inpasigurado na iti commander in chief nga agtalinaed da nga apolitical ken komited iti sinapataan da a trabaho.
