LAOAG CITY – Kiniddaw ti Malacañang ti panagan-anus ti publiko mainaig iti maisaysayangkat nga imbestigasyon ken ti pannakaipila ti kaso kontra kadagiti personalidad ken indibidual nga adda ti pakainaigan dagiti maanomalya a flood control projects.
Inpetteng ni Palace Press Officer Usec. Claire Castro a kasapulan a suruten ti umiso a proseso.
Inlawlawag na nga adda dagiti gundaway a kasapulan dagiti ebidensya no sadinno nga apaman a makompleto ket isu metten ti panangirekomendar ti Ombudsman a maipila ti kaso iti Sandiganbayan.
Kuna na a kalpasan a maipila ti kaso ket mangiparuk-at ti Sandiganbayan ti warrant of arrest kontra kadagiti akusado.
Innayon ni Castro nga adda pay dagiti pending a preliminary investigations iti Ombudsman ken Department of Justice ken mangnamnama a maawatan dagiti umili ti naan-anay a pannakaadal ken pannakaanalisar ti maysa a kaso gapu ta saan a maidalan daytoy iti maysa laeng a turog no di ket adda ti sursuruten a due process.
Immunan a nagpangta ni Presidente Ferdinand Marcos Jr. kontra kadagiti indibidual a karaman iti korapsyon iti flood control projects a maipisok da iti pagbaludan sakbay ti Christmas Day.
