LAOAG CITY – Inpasingked ni P/Capt. Sygman Benigno, Hepe ti San Nicolas Municipal Police Station a naiget ti panangikagumaanna iti pannakagun-od ti pannakaideklarar ti drug-cleared barangay.
Inbatadna a naiget ti panagbinnulig ti kapulisan ken ti lokal a gobierno iti ili ti San Nicolas tapno naan-anay a maideklarar kas drug-cleared barangay iti intero nga ili.
Inlawlawagna nga adda ti dua nga istratehia nga ar-aramiden dagiti otoridad iti pananglaban kontra iti iligal a droga.
Kunana a ti umuna ket ti supply reduction strategy wenno dagiti law enforcement operations a maiwaywayat kas ti search operation ken anti-illegal drug buy-bust operation idinto a ti maikadua ket ti demand wenno ti kasapulan a pannakipaset ti lokal a gobierno kadagiti ar-aramiden ti pulisia.
