LAOAG CITY – Inbilin ni Presidente Ferdinand Marcos Jr. iti Department of Interior and Local Government (DILG) ken iti Philippine National Police (PNP) a siguradwen ti lokasyon da Sarah Discaya, Maria Roma Angeline Remando, ken dadduma pay a karaman nga opisyal ti Department of Public Works and Highways tapno alisto da a maarestar apaman a maiparukpat ti arrest warrant manipod iti korte.
Immuna iti daytoy, inrakurak ni Presidente Marcos nga inrekomendaren ti Ombudsman ti pannakaipila ti kaso kriminal kontra kadagiti karaman iti maipagarop a ghost flood control project iti Kulaman, Jose Abad Santos, Davao Occidental nga agbalor ti agarop 100 a milyon a pisos.
Nailanad iti reklamo dagiti nagan manipod iti St. Timothy Construction, karaman da Cezarah Rowena Discaya ken Maria Roma Angeline Remando, karaman ti sumagmamano a personnel ti DPWH personnel a maipagarop a nangpaalisto ti panangaprubar kadagiti dokumento a nagresulta iti panangiparuk-at ti sibubukel pondo.
Inpasigurado ti presidente nga ado dagiti karaman iti flood control anomaly ti mapan agpaskua iti pagbaludan.
