LAOAG CITY – Natay ti 25 nga indibidual kalpasan ti pannakauram ti mabigbig a nightclub idiay India.
Mapapati a karaman kadagiti pimmusay ket dagiti sumagmamano nga staff ken turista iti Birch iti Romeo Lane nightclub a masarakan iti asideg ti mabigbig a baybay.
Basar kadagiti otoridad, rumrummuar a bimtak ti gas cylinder iti kusina ti club a nangitunda ti uram.
Naarestar ti Manager ti nasao a nightclub ken naisyuan met ti arrest warrant ti akinkukua daytoy.
Ti Goa ket dati a Portuguese colony iti Arabian Sea a makaallukoy ti minilyon a turista iti kada tawen.
Mainaig iti daytoy, inbatad ni Chief Minister Pramod Sawant ti Goa nga adda ti tallo a tattao ti natay gapu iti pannakauramda idinto a dagiti dadduma ket gapu met iti suffocating.
Kunana nga adda pay ti tallo wenno uppat a turista ti natay ngem saannan nga inbuksilan ti tawen wenno nationality dagitoy idinto nga adda ti innem iti ospital nga addan iti nasayaat a kasasaad.
Indanon ti pannakipagladingit ni Prime Minister Narendra Modi iti napasamak babaen ti panag-post daytoy iti social media.
Naammoan nga adda ti agarup 5.5 milyon a turista ti bimmisita iti Goa iti umuna a kagudua ti tawen no sadinno a basar iti datos ti gobierno ket adda ti 270 a ribu ti aggapu iti ballasiw taaw.
