LAOAG CITY – Iti naiyuswat a bicameral conference committee meeting mainaig iti lungalong a nailyan a pondo para iti 2026, sumagmamano a senador ken kangrunaan a lider ti Simbaan Katolika ti nagballaag iti panagngato ti pondo para iti Medical Assistance for Indigent and Financially Incapacitated Patients (MAIFIP) program, a mabalin a mausar para iti patronage politics.
Ummuna iti daytoy, inaprubaran dagiti miembro ti Senado ken ti Kamara de Representantes ti panagngato ti pondo ti MAIFIP iti 51 bilyon para iti 2026.
Daytoy ket kalpasan ti apela ti House panel nga isubli ti 49-bilyon nga alokasyon—nagngatngatp ngem iti 24.2 bilyon a pondo a nailatang babaen iti National Expenditure Program (NEP).
Ita a tawen 2025, adda ti P41.16 bilyon nga alokasyon iti Medical Assistance for Indigent and Financially Incapacitated Patients program babaen iti DOH budget.
Iti bersiyon ti lungalong ti Senado, nakissayan ken napagbalin a P29 bilyon laeng ti MAIFIP funding para iti 2026.
Nagballaag ni House Appropriations Committee chairperson Mika Suansing, a no agtalinad ti kalikagom ti Senado, posible a makaapektar iti agarop 1.1 milyon a pasyente.
Ti Medical Assistance for Indigent and Financially Incapacitated Patients ket programa a tulong-pinansyal ti Department of Health (DOH) a gagem na a mangipaay ti suporta ken magastos iti medikal dagiti kuwalipikado nga aplikante, pakairamanan ti indigent ken dagiti pasyente a marigrigat.
Sakop ti tulong dagiti gastos a saan a karaman iti benepisyo nga ipapaay ti PhilHealth, pakairamanan ti benefit packages, case rates, wenno dadduma pay.
