LAOAG CITY – Naisuro kadagiti residente ditoy ciudad ti Laoag ti pannaka-recycle dagiti goma a saanen a mausar.
Daytoy ti inpakaammo ni Miss Mylene Pascual, ti mangidadaulo iti City Environment and Natural Resources ditoy ciudad ti Laoag.
Kuna na a nakita da ti abilidad dagiti residente gapu ta kabaelan da a pabarwen dagiti banag a saanen a mausar tapno mausar iti sabali a wagas kas kadagiti saanen a maus-usar a ligay ti lugan a mabalin a dekorasyon ken sala set.
Inbatad na a naisuro pay kadagiti residente ti napintas a disenyo dagiti ligay kas koma iti tugaw, lamisaan ken mabalin pay a mapagbalin a sala set.
Nangipaay ti gobierno lokal ditoy ciudad kadagiti usaren da tapno itultuloy da ti agaramid ken mabalin pay a nayun daytoy ti pamastrekan da.
Inpakaammo ni Pascual a ti nasao nga aktibidad ket pagbibinnuligan ti City Environment and Natural Resources, City Social Welfare and Development, City Agriculture Office, Liga ng mga Barangay, grupo ti mannalon ken babbai iti Barangay Santa Maria ken Barangay Suyo.
Maragsakan ni Pascual gapo ta malaksid nga adda ti nayun a pamastrekan dagiti residente ket dakkel pay a makatulong tapno makissayan ti basura iti aglawlaw.
