LAOAG CITY – Naisayangkat ti National Day of Reflection idiay Australia kalpasan ti napasamak a Bondi Beach attack iti kallabes.
Naobserbar ti sumagmamano a minuto a panagulimek dagiti naruay a tattao kas panangipeksa ti kaririknada iti nakaam-ames a krimen.
Indauluan mismo ni Prime Minister Anthony Albanese ti nasao nga event kagiddan ti naiget a panangkondenarna iti insidente.
Maipalagip a pinaltu-paltogan dagiti agama a suspek nga isuda Sajid Akram nga agtawen ti 50 ken ti anakna a ni Naveed nga agtawen ti 24 dagiti tattao nga adda iti Jewish festival a nangitunda ti pannakatay ti 15 nga indibidual.
Kabayatanna, nangiyuswat ti vigil ti National Council of Jewish Women Australia nga indauluan ni Governor-General Samantha Mostyn no sadinno a nagsuot dagitoy ti bado nga agmaris ti puraw kas simbolo ti kappia.
