LAOAG CITY – Kinumpirmaran dagiti otoridad nga agtugma dagiti initial findings ti National Bureau of Investigation (NBI) ti viral dashcam footage iti Kennon Road, Benguet no sadinno a makita ni dati a Department of Public Works and Highways (DPWH) Undersecretary Catalina Cabral a nakatugaw iti kalsada sakbay ti pannakatayna idi Disiembre 18.
Napaneknekan ti Philippine National Police (PNP) ken Department of the Interior and Local Government (DILG) Secretary Jonvic Remulla a ti selfie photo ti driver ni Cabral ket pudno ken agtugma iti tao nga adda iti video.
Inbatad ni Philippine National Police acting chief Police Lt. Gen. Jose Melencio Nartatez Jr., nalawagen ti pakabigbigan ti bangkay ken nakatutok ti nailian a pulisia iti panangimbestigar no ania ti pudno a napasamak iti dati a Department of Public Works and Highways official.
Kunana a tumultulong ti Philippine National Police iti panagkalap kadagiti ebidensia nga adda ti pakainaiganna ken ni Cabral a posible a makatulong iti imbestigasion iti maanomalya a flood control projects.
Malaksid iti daytoy, naiwayat ti crime scene reconstruction iti Kennon Road ken birbiruken ti National Bureau of Investigation ti hotel room ni Cabral no sadinno a nakumpiskar dagiti personal a kagamitan ken dokumento daytoy.
Kabayatanna, ti bangkay ni Cabral ket agdama nga adda iti memorial chapel idiay Quezon City.
