LAOAG CITY – Saan nga inaprubaran ti konseho ti ordinansa a pannakaiyalokar ti pondo para iti pannakapapintas ti munisipyo iti ili ti San Nicolas.
Daytoy ti inbatad ni Mayor Edmar Vincent Bonoan iti ili ti San Nicolas.
Rumrumuar a ti maysa a rason ti konseho ket saan da a kayat a mabalbaliwan ti disenyo na gapu ta adda paylaeng ti pondo a saan a nausar para iti daytoy, ken dadduma pay nga isyu.
Nupay kasta, inlawlawag ni Mayor Bonoan a saan a magaraw ken mabaliwan ti structure ti munisipyo no di ket papintasen, madalusan ken ipreserba da laeng.
Inpettengna a nakababain pay ti langa iti old Sang bayan session hall.
Kabayatanna, inbatad ni Mayor Bonoan nga inaprubaran ti konseho ti Supplemental budget 5,6,7,8 para iti maipaay a bonus dagiti empleado ngem para kenkuana ket naladaw ti pannakaaprubar na.
Kuna na a kiniddaw na idi Huwebes, Disyembre 18 ti panangiwayat ti special session ti konseho para iti panangaprubar da iti supplemental budget ngem idi laeng lunes nga inaprubaran da daytoy.
Inpalgak na a pudno a nangiwayat ti special session ti konseho idi Biernes, Disyembre 19 ngem saan met a ti supplemental budget ti trinatar da no di ket maipanggep iti Resolution of Condolence.
Inpaganetget ti mayor ng uray naaprubaran idi Lunes ti pondo ngem saan a basta maiparuk-at ken maipaay ti bonus dagiti empleado gapu ta adda ti sursuruten a proseso.
