LAOAG CITY – Inlawlawag ni Mr. Christopher King Medina, ti mangidadaulo iti Persons with Disability Affairs Office ditoy ciudad ti Laoag a dagiti parking space para kadagiti addaan ti rangkap ti bagina ket saan a mabalin a para pay kadagiti senior citizen gapu ta agduma dagitoy a sitwasyon.
Segun kenni Medina, adda ti maysa nga establismiento ditoy ciudad a maobserbaran na nga uray siasino ket mapalubosan nga agparking kadagiti naikeddeng laeng a para kadagiti senior citizens wenno dagiti addaan ti rangka ti bagina.
Innayon na nga adda ti ipapaay ti opisina da car pass wenno parking permit a mabalin da nga ikabil iti sarming da nga alisto a pakakitaan ti pakabigbigan a ti nagparking ket maysa nga addaan ti rangkap ti bagi na.
Kabayatanna, inpakaammo na a no ti maysa a senior citizen ket saan a makapagna nga isu ti rason ti panagparking da iti person with disability parking space ket rumbeng a mangala da ti PWD ID gapo ta saan met a maipawil a mangala da kadagitoy a dua a klase ti Identification Card.
Innayon na a naaramid ti Person With Disability Parking Space gapu ta as-asideg ti ruwangan tapno saanen a marigatan dagiti addaan ti rangkap ti bagina.
