LAOAG CITY – Inaprobaranen ti Bicameral Conference Committee ti P6.793 trilyon a national budget para iti 2026.
Pinirmaan dagiti pannakabagi manipud iti Senado ken Kamara ti bicameral report kalpasan ti deliberasion iti Philippine International Convention Center, Pasay City.
Inbatad ni House Appropriations Chair Mikaela Suansing, nakasentro ti pundo iti human capital development ken transparency.
Dinakamat ni Senate Finance Chair Sherwin “Win” Gatchalian a dakkel ti alokasion para iti edukasion, salun-at ken agrikultura.
Daytoy ti immuna a gundaway a naisayangkat a nakalukat iti publiko ti bicam deliberations iti babaen ti livestream.
Gagem daytoy a maliklikan dagiti anomalya ken nayonan ti talek dagiti umili iti proseso ti pundo.
Ratipikaran ti Senado ken Kamara ti bicameral report inton Disiembre 29.
Manamnama a pirmaan ni Presidente Ferdinand Marcos Jr. ti General Appropriations Act iti umuna a paset ti Enero 2026.
