LAOAG CITY – Natay ti 13 nga indibidual ken agarup 100 ti nasugatan gapu iti train crash iti south-eastern Oaxaca region idiay Mexico.
Basar iti imbestigasion, dumaldalyasat ti tren iti nagbaetan ti Gulf of Mexico ken ti Pacific Ocean nga adda ti 241 a pasahero ken siam a crew members ti nakalugan.
Adda ti pakabuklan a 98 ti nagsagaba ti sugat iti nagduduma a paset ti bagida no sadinno a 36 kadagitoy ket naitaray iti ospital para iti naan-anay a pannakatamingda.
Inrakurak ni Mexican President Claudia Sheinbaum a lima kadagiti nasugatan ket adda iti kritikal a kondision.
Inbatadna a nagturong iti lugar dagiti top level officials pakairamanan ti secretary of the navy.
Mainaig iti daytoy, makita kadagiti ladawan dagiti rescue workers a napan timmulong a nang-rescue kadagiti pasahero.
Naammoan a nadiskaril ti tren apaman a naglikko iti asideg iti ili ti Nizanda.
Kinumpirmaran ti Attorney General ti Mexico a manarimaan ti naun-uneg nga imbestigasion mainaig iti insidente.
Kabayatanna, indanon ni Salomón Jara Cruz, Governor ti Oaxaca ti napalaos a pannakipagladingitna kadagiti maseknan a pamilia dagiti biktima kagiddan ti panangipasingkedna ti naiget a koordinasion dagiti otoridad iti federal agencies tapno asistaran dagiti naapektaran.
