LAOAG CITY – Agsagsaganan ti Ilocos Norte Youth Development Office para iti pannakaisayangkat ti nagduduma a programa ken proyekto para kadagiti agtutubo ditoy probinsia.
Inpasigurado ni Mr. Willie Jake Sib-at, Ilocos Norte Youth Development Officer a kas iti daytoy a tawen ket adu manen dagiti maipaay a serbisio a para iti pagsayaatan dagiti agtutubo.
Segun kenkuana, umuna ditoy ti tulong pinansial a maidiaya para kadagiti agtutubo ditoy probinsia a mangala ti licensure examination iti umuna a quarter ti tawen 2026.
Inlawlawagna a plano ti opisinada a lukatan iti umuna a lawas ti bulan ti Enero ti panagawatda ti aplikasion dagiti interesado a manggundaway iti Review and Examination Assistance Program wenno REAP para kadagiti ageksamen iti bulan ti Enero, Pebrero ken Marso.
Inbatadna a malaksid iti Review and Examination Assistance Program ket addanto manen ti maipaay a libre a review para kadagiti mangala ti Civil Service Examination.
Kuna ni Sib-at a puntiriada ti mangisayangkat ti libre a review iti sibubukel a bulan ti Pebrero para kadagiti interesado ken kadagiti nakaipila ti panageksamenda ti civil service intono bulan ti Marso.
