LAOAG CITY – Kinumpirmaran dagiti otoridad idiay Australia a dagiti agama a suspek iti pammaltog iti Bondi Beach ket saan a nakikappeng iti aniaman a terorista a grupo.
Basar kadagiti otoridad, ti suspek a ni Sajid Akram, agtawen ti 50 ken ti anak na a ni Naveed Akram, agtawen ti 24 ket awan ti nakikappengan da a terror group.
Naala da pay ti kopya ti CCTV wenno Closed Circuit Television iti ibibisita da iti Pilipinas partikular iti ciudad ti Davao ken nakita nga awan ti aniaman nga indikasyon a nagsanay da iti maysa a terrorist organization agingga a nakasubli dagitoy iti Sydney idi Nobyembre 29.
Maipalagip a nagpalto-paltog dagiti agama kabayatan ti panagtitipon dagiti Jewish community iti Bondi Beach a nakatayan ti 15 a tattao karaman ti ama a suspek a ni Sajid.
Agtultuloy paylaeng ti panagim-imbestigar dagiti otoridad ken tingtingitingen da a naimbag dagti naukkon da nga ebidensiya.
