LAOAG CITY – Natay ti maysa a lalaki kalpasan a maipagarup a dinanog ti kabarangayanna gapu iti panangpaburborna ti motorsiklona kabayatan ti panangsarabo ti baro a tawen iti Barangay Maananteng iti ili ti Solsona.
Segun ken ni P/Capt. Randy Damo, Hepe ti Solsona Municipal Police Station, ti biktima ket agtawen ti 45, awanan asawa, mannalon idinto a ti suspek ket agtawen ti 55, naasawaan, mannalon ken agpada dagitoy a residente iti Barangay Maananteng iti ili ti Solsona.
Inbatadna a basar iti pannakisarsaritada ti maysa kadagiti nakakita ti insidente, agawiden ti biktima kaduana dagiti papagayamna ngem nagsardeng dagitoy iti maysa a waiting shed kagiddan ti panangpaburborda dagiti motorsikloda.
Gapu iti daytoy, naringgoran ti suspek isut gapuna a rimmuar isuna iti pagtaenganda ken napanna kinasarita dagiti grupo dagiti lallaki a pakairamanan ti biktima nga umadayo dagitoy.
Nupay kasta, apaman nga umadayo dagiti grupo dagiti lallaki ket naminsan manen a pinaburbor ti biktima ti motorsiklona a rason a nakapungtot ti suspek.
Inlawlawag ni P/Capt. Damo a ginandat ti suspek a kabilen ti biktima ngem naanawa daytoy ngem idi makaala ti gundaway ti suspek ket kellaat a dinanogna ti biktima isut gapuna a natulid ken naawanan ti puot.
Kunana a naitaray iti ospital ti biktima ngem pimmusay kabayatan a matamtaming.
Innayonna nga iti agdama ket iyur-urayda ti resulta ti medico legal ti biktima nga isu ti pangibasaranda no ania ti maipila a kaso kontra iti suspek no homicide wenno murder.
