LAOAG CITY – Naiget ti reserbasyon ni Senador Francis “Kiko” Pangilinan iti implementasyon ti P33 bilyon a balor ti farm-to-market roads (FMR) ti Department of Public Works and Highways (DPWH), uray pimmabor iti nailungalong a General Appropriations Bill para iti 2026.
Iti rakurak ni Pangilinan, chairman ti Senate Committee on Agriculture, Food and Agrarian Reforms, narisgo unay iti anti-corruption efforts ken seguridad iti taraon no maisubli iti Department of Public Works and Highways ti panagipasdek kadagiti farm-to-market roads.
Kuna na a suportaran na ti bicameral conference committee report ngem kinddaw na ken ni Presidente Ferdinand Marcos Jr. nga i-veto ti probisyon a palubusan ti Department of Agriculture (DA) a maipalaon iti memorandum of agreement iti Department of Public Works and Highways para iti ₱33-billion a balor ti farm-to-market roads program.
Innayon na nga agtalinaed nga adda iti ikot ti Department of Public Works and Highways ti saan a nasolbar a kaso administratibo ken kriminal nga adda ti pakainaigan iti flood control projects.
Dinakamat pay ti senador a nalawag iti babaen ti Section 52 ti Republic Act No. 8435, wenno ti Agriculture and Fisheries Modernization Act, nga obligasyon ti Department of Agriculture ti planning ken prayoridad da ti farm-to-market roads iti pannakitinnulong dagiti lokal a gobierno ken grupo dagiti mannalon ken mangngalap.
Dinakamat pay ni Pangilinan a saan a matungtungpal ti Department of Public Works and Highways ti backlog na a 60,000 kilometro ti farm-to-market roads, basar iti datos ti Department of Agriculture.
Kabayatanna, ti Central Luzon ti kadakkelan ti naiyalokar a para iti farm-to-market roads gapu ta umabot iti P33.9-billion.
