LAOAG CITY – Natay ti maysa a mannalon kalpasan a pinaltu-paltogan ti riding in tandem iti Barangay 2 San Roque iti ili ti Paoay.
Nabigbig ti biktima a ni Gilbert Dumaoal, agtawen ti 40, mannalon ken residente ti Barangay 5, Nalasin iti ili ti Paoay.
Segun ken ni P/Capt. Jackson Sugayen, Hepe ti Paoay Municipal Police Station, kabayatan a dumaldalyasat ti biktima a nakamotorsiklo nga agturong nga agpa-abagatan iti paset ti Suba-Balacad road ken apaman a nakadanon iti Sitio Banitog iti bisinidad ti Barangay 2, San Roque iti ili ti Paoay ket kellaat lattan a pinaltu-paltogan ti sumagmamano a daras dagiti saan pay a nabigbig a suspek a nakalugan ti motorsiklo.
Inbatadna nga insigida met a naglibas dagiti suspek ken nagturong iti saan pay a masinunuo a direksion.
Nupay kasta, manarimaan ti panangkitada kadagiti Close Circuit Television camera a mabalin a nakaimuntar iti asideg iti nakapasamakan ti insidente.
Inlawlawagna nga adda dagiti nakairamramanan ti biktima iti nagduduma a klase ti krimen iti kallabes ngem saanna pay nga inbuksilan dagitoy.
Kunana a saan pay a masinunuo no mano ti tama ti paltog ti biktima gapu ta maiyur-uray pay laeng ti resulta ti post-mortem examination.
Naitaray ti biktima iti Mariano Marcos Memorial Hospital and Medical Center iti siudad ti Batac ngem naideklarar a dead on arrival babaen ti attending physician.
Mainaig iti daytoy, binigbig ni Atty. Ferdinand Ignacio, dati a Bise Mayor iti ili ti Paoay ti biktima iti pammaltog a ni Boyet Dumaol a residente ti Barangay 5 iti ili ti Paoay ken dati a driver ni Mr. Roberto “Bobby” Diaz.
Dinakamat ni Atty. Ignacio a ni Diaz ket nagpaidasig idi kas Mayor iti ili ti Paoay ngem napaay ken nasinged a pagayam ni Presidente Ferdinand Marcos Jr.
Kiniddawna ken ni Diaz a kitaenna a naimbag ti napasamak gapu ta kaasi met ti pamilia ti biktima.
Iti agdama, agtultuloy ti iwaywayat nga imbestigasion dagiti otoridad mainaig iti insidente.
Kabayatanna, inpakaammo ni Mrs. Marissa Perote, asawa ti biktima iti pammaltog nga awan met dagiti malagipna a nakariri ti asawana a mabalin a nangaramid iti krimen.
Kunana a napan nagpadanum iti kataltalonan ti asawana sakbay a napasamak ti insidente.
Mangnamnama a sumuko dagiti suspek iti kabiitan a panawen tapno maipaayan ti hustisia ti pannakatay ti asawana.
Naammoan nga adda ti dua nga annak ti biktima nga agtawen ti 16 ken 6.
Innayon met ti anak ti biktima nga adda dagiti unknown numbers a timmawag iti cellphone ti amana iti kallabes a birbirukenda ti amana iti saan a masinunuo a rason.
