LAOAG CITY – Inpakaammo ni Dr. Alan Taylan, Internal Medicine ti St. Camillus De Lellis Hospital nga al-alisto a makaakar ti Super Flu maidasig iti gagangay laeng a trangkaso.
Segun ken ni Dr. Taylan, daytoy ket kalpasan a nakarkaro ti Super Flu no idasig kadagiti dadduma pay a gagangay a klase ti sakit.
Inbatadna a maiyakar ti virus babaen ti respiratory droplets manipud iti agong wenno ngiwat kabayatan nga agsarsarita, aguy-uyek ken agatsing.
Inlawlawagna a ti gagangay laeng a trangkaso ket umabot iti dua agingga iti tallo nga aldaw ngem ti Super Flu ket mabalin nga umabot iti maysa agingga iti dua a lawas no sadinno a dagiti agtawen ti lima ken agpapaba ken dagiti agtawen ti 65 ken agpababa ti kangrunaan a makaptan ti nasao a sakit.
Kunana a makapasar ti narigat a panaganges ti maysa nga indibidual a tinamaan daytoy wenno makarikna ti Chronic Obstructive Pulmonary Disease (COPD).
Gapu iti daytoy, masapul a malimitaran ti pannakilangen-langen kadagiti adu a tattao tapno maliklikan a maakaran ti nasao a sakit.
Inpaganetgetna a makatulong pay ti regular a panagbuggo ti ima ken panagisuot ti face mask no rummuar iti pagtaengan.
Maipalagip a nagraira iti napalabas a bulan kadagiti nagduduma a paset ti lubong partikular iti Amerika ken Europa ti maysa a baro a variant ti influenza A (H3N2) a no awagan ket subclade K wenno ad-adda nga am-ammo iti awag a Super Flu.
Immuna iti daytoy, umaboten iti sumurok 60 a kaso ti Super Flu ti nairekord ti Department of Health iti intero a pagilian.
